Cronfa Annette Bryn Parri
Cronfa newydd er cof am y Pianydd Annette Bryn Parri i ysbrydoli’r genhedlaeth nesaf o gerddorion Cymru
Mae cronfa elusennol newydd wedi’i chreu er cof am y pianydd o fri Annette Bryn Parri, gyda’r nod o feithrin a chefnogi doniau cerddorol pobl ifanc ledled Cymru.
Bydd Cronfa Annette Bryn Parri, a sefydlwyd gan ei theulu ac sy’n cael ei rheoli gan Sefydliad Cymunedol Cymru, yn darparu grantiau i helpu pobl ifanc i dderbyn gwersi, offerynnau cerdd a chyfleoedd hyfforddi – yn enwedig y rhai na fyddent fel arall yn gallu manteisio ar y cyfle. Dros y flwyddyn nesaf, bydd y teulu’n codi arian i dyfu’r gronfa, gyda’r bwriad o ddyfarnu’r grantiau cyntaf yn ddiweddarach yn 2026.
“Mae’r gronfa hon yn ffordd i ni anrhydeddu bywyd ac angerddau Annette – menyw a roddodd bopeth i gerddoriaeth, ei chymuned, a’r bobl y credai ynddynt. Trwy’r etifeddiaeth hon, rydyn ni’n gobeithio rhoi’r un anogaeth a chyfle i eraill ag a roddodd hi mor rhydd,” meddai teulu Annette.
Ganwyd Annette yn Neiniolen, Gwynedd, ac roedd hi’n enwog nid yn unig am ei dawn gerddorol ryfeddol ond hefyd am ei chynhesrwydd, ei haelioni a’i hiwmor. Ar ôl hyfforddi yn y Royal Northern College of Music, daeth yn un o gyfeilyddion a chyfarwyddwyr cerddorol mwyaf parchus Cymru, gan weithio ochr yn ochr â rhai o leisiau mwyaf y genedl, gan gynnwys Bryn Terfel a Rebecca Evans. Roedd hi’r un mor falch o’i gwaith gyda chorau cymunedol, achosion elusennol, a’i hymrwymiad i wneud cerddoriaeth yn hygyrch i bawb.
Dywedodd Katy Hales, Cyfarwyddwr Dyngarol Sefydliad Cymunedol Cymru:
“Fe wnaeth cerddoriaeth Annette gael effaith ar gymaint o fywydau ac roedd hi wir yn ymgorffori ysbryd diwylliant Cymru – angerdd, haelioni, ac wedi’i wreiddio yn y gymuned. Bydd y gronfa hon yn parhau â’r amcanion hyn, gan helpu i lunio dyfodol cerddoriaeth yng Nghymru am genedlaethau i ddod. Rydym yn falch iawn o sefyll ochr yn ochr â theulu Annette i ddiogelu ei hetifeddiaeth, a byddwn yn defnyddio ein harbenigedd i sicrhau bod pob rhodd i’r gronfa yn cael yr effaith fwyaf bosibl.”
Bu’r Eisteddfod Genedlaethol yn rhan ganolog o daith gerddorol Annette. Mae lansio’r gronfa yn ystod yr ŵyl yn Wrecsam yn 2025 yn deyrnged addas – mewn lle sy’n dathlu’r iaith Gymraeg, diwylliant Cymru, a doniau sy’n dod i’r amlwg – popeth roedd Annette yn ei gredu ynddo.
Mae rhoddion i Gronfa Annette Bryn Parri bellach ar agor, ac fe fyddant yn helpu pobl ifanc yng Nghymru i wireddu eu huchelgeisiau cerddorol. Bydd teulu Annette hefyd yn cynnal digwyddiadau codi arian dros y flwyddyn nesaf gyda’r nod o ychwanegu at y gronfa.
